Yocritico

  Os nacionalistas recordan que o informe xurídico da Secretaría Xeral do Concello é concluínte ao indicar que é un contrato anual que se pode rescindir “sen pagar un peso” tan só con anunciar, con quince días de antelación ao vencemento, que o Concello non quere renovar o aluguer. “O contrato extinguiríase o 24 de abril de 2008 sen pagar un peso”.

  Desde o BNG tamén inciden no “despropósito” de pagar 143.000 € pola rescisión do contrato cando os inquilinos pagan “pouco máis de 100 € ao ano”. E lembran o estado de conservación do cine nos seus últimos tempos abertos ao público para negar que haxa que pagar por obras de mellora, algo que sosteñen PP e CxB. “Quen gaña con isto?” preguntan.

  O BNG lembra que a única vez que se lle pediu opinión ao BNG sobre o rescate do cine foi no ano 2003. Daquela o BNG manifestou a súa oposición a pagar nin un céntimo por algo que xa é de Betanzos, o que obrigou ao exalcalde Manuel Lagares e o daquela conselleiro Jaime Pita, a deixar o asunto sobre a mesa. A principios deste ano e xa en época plenamente preelectoral Manuel Lagares, sen contar co BNG e sen decidirse en ningún órgano do Concello, presenta na prensa o protocolo coa Deputación. Para os nacionalistas, ese documento é “papel mollado” tanto polo seu carácter electoralista como por ser incorrecto porque “o protocolo fala de rescatar unha concesión e o cine se rixe por un contrato de aluguer”. Cualifican de “rigorosamente falso” o afirmado por PP e CxB de que se non se lle paga agora aos Pita esa cantidade “astronómica” se pode perder a axuda provincial.