Yocritico

Para Galiza Nova, o feito de que o PP non convocase o Consello da Mocidade incumprindo coa normativa municipal responde á necesidade de ocultar a ausencia de medidas específicas para a mocidade betanceira. “Non queren oír aos representantes da mocidade porque lle deron as costas á mocidade” resumen desde a Dirección Local. Lembran que a única medida para a mocidade adoptada polo PP foi o anuncio de que trataban de abrir as instalacións dos centros de ensino fóra do horario lectivo, unha iniciativa á que as Nuevas Generaciones do PP se opuxeran cando Galiza Nova a levou ao Consello da Mocidade e da que se apropiou posteriormente o PP.

Galiza Nova solicitou ao goberno municipal un cumprimento escrupuloso da propia normativa municipal no que se refire á xuntanza do Consello da Mocidade e lamentou que as publicacións municipais enfocadas á mocidade levaran portadas con elementos sexistas dado que se trata dunha publicación institucional. A Dirección Local das mocidades do BNG foi máis alá ao lamentar que o concello se dedique a copiar os contidos das publicacións da Dirección Xeral de Xuventude polo que supón de duplicar gastos. Entenden que se trata dunha decisión “partidista e sectaria”.

A Dirección Local de Galiza Nova, reunida na tarde de onte, resumiu a política de mocidade do PP coma “plaxio de iniciativas, máis plaxio de publicacións, máis sexismo, máis inoperancia” e lamentan que o PP pretenda “silenciar á voz representativa da mocidade de Betanzos” porque “saben que vai reprobar a súa actuación”.